Halloween, i njohur për kostumet, çokollatat dhe argëtimin “e frikshëm”, është shumë më tepër sesa një ditë festash. Ai është një motor i fuqishëm ekonomik që gjeneron miliarda dollarë çdo vit.
Pavarësisht kostove në rritje, pjesa më e madhe e qytetarëve amerikanë nuk do të heqin dorë nga kjo festë. Sipas Federatës Kombëtare të Shitjeve me Pakicë (National Retail Federation), 73% e shtetasve planifikojnë ta festojnë Halloween, një përqindje e ngjashme me atë të vitit të kaluar (72%).
Në vitin 2025, shpenzimet pritet të arrijnë nivelin rekord prej 13.1 miliardë dollarësh, duke tejkaluar kaluar gjithashtu kulmin historik prej 12.2 miliardë dollarësh të vitit 2023.
Aktivitetet më të zakonshme për festën janë: shpërndarja e çokollatave (66%), veshja me kostume (51%) dhe zbukurimi i shtëpive apo oborreve (51%). Gjithashtu, 46% planifikojnë të gdhendin kunguj, 32% të organizojnë ose marrin pjesë në festa, 24% të vizitojnë shtëpi të frikshme, dhe 23% të veshin edhe kafshët e tyre shtëpiake.
Në total, shpenzimet për çokollata pritet të arrijnë 3.9 miliardë dollarë, ndërsa kostumet do të gjenerojnë rreth 4.3 miliardë dollarë. Zbukurimet janë gjithashtu në rritje, me 78% të konsumatorëve që planifikojnë t’i blejnë (krahasuar me 75% një vit më parë), me një total prej rreth 4.2 miliardë dollarësh.
Mesatarisht, çdo person në SHBA pritet të shpenzojë 114.45 dollarë, rreth 11 dollarë më shumë se një vit më parë, duke kaluar rekordin e mëparshëm prej 108.24 dollarësh të vendosur në 2023./SCAN
