Në një kohë kur shumë të rinj dhe punëkërkues përballen me vështirësi për të hyrë në tregun e punës, programi i vetëpunësimit ofron një mundësi për ata që kanë një ide biznesi dhe duan ta kthejnë atë në një aktivitet të qëndrueshëm ekonomik.
Programi u drejtohet personave të papunë, të cilët përveç mbështetjes financiare, përfitojnë edhe trajnim dhe asistencë profesionale për zhvillimin e planit të biznesit. Ekspertë të kualifikuar i ndihmojnë aplikantët të strukturojnë idenë e tyre dhe të ndërtojnë një projekt të realizueshëm.
Pas procesit të vlerësimit, planet më të mira të biznesit financohen deri në vlerën e 1 milion lekëve, duke krijuar mundësi për hapjen e aktiviteteve të reja dhe gjenerimin e të ardhurave.
Aplikimet kryhen online përmes portalit e-Albania, në shërbimin “Kërkesë për Pjesëmarrje në Programin e Vetëpunësimit”. Pas plotësimit dhe dorëzimit të formularit, kërkesat shqyrtohen nga zyrat e punës, ndërsa aplikantët njoftohen elektronikisht për rezultatin e vlerësimit.
Shërbimi ofrohet pa pagesë dhe përgjigjja për aplikimin jepet brenda pesë ditëve. Afati i fundit për të aplikuar është data 4 qershor, duke u dhënë mundësi të interesuarve të hedhin hapin e parë drejt krijimit të biznesit të tyre.
