Në kuadër të bashkëpunimit të ngushtë me Universitetin Bujqësor të Vjenës (BOKU), ekipi austriak ka kryer misionin e tij të 18-të në Universitetin Bujqësor të Tiranës (AUT), duke vazhduar me përkushtim punën për transformimin e plotë të institucionit shqiptar.
Sipas publikimit online nga Rektori i Universitetit Bujqësor të Tiranës Prof. Dr. Fatbardh Sallaku, fokusi i këtij misioni ka qenë riorganizimi i plotë i programeve të Masterit, ofertës së Doktoraturës dhe strukturës administrative. Kjo synon krijimin e një oferte akademike të lartë cilësore, përballuese të sfidave të së ardhmes dhe të përshtatur me zhvillimet globale, si dhe me objektivat e Shqipërisë për vitin 2030.
“Ky partneritet përfaqëson më shumë se një reformë. Ai pasqyron një përkushtim të përbashkët për ekselencë, rëndësi dhe një të ardhme evropiane për arsimin e lartë në Shqipëri”, theksohet në mesazhin e rektorit.
Transformimi i UBT-së, i mundësuar falë mbështetjes së vazhdueshme të ekipit të BOKU-s të udhëhequr nga Prof. Hubert Hasenauer, ka në qendër vizionin për edukimin e profesionistëve të rinj, të aftë të kontribuojnë në mënyrë aktive në rrugën e vendit drejt Integrimit në Bashkimin Evropian. Programet e reja master, të ndërtuara mbi kompetencat thelbësore të universitetit, synojnë ta pozicionojnë atë si një institucion unik dhe dallues në skenën arsimore kombëtare dhe rajonale.
Projekti UBT-BOKU vazhdon të jetë një shembull konkret i bashkëpunimit ndërkombëtar që synon ngritjen e standardeve dhe përafrimin e arsimit të lartë shqiptar me hapësirën europiane të kërkimit dhe inovacionit.
