Industria e verës dhe pijeve alkoolike në Francë pritet të humbasë rreth 1 miliard euro nëse Shtetet e Bashkuara vendosin tarifën 15% për produktet e tyre javën e ardhshme.
Masa, që pritet të hyjë në fuqi më 7 gusht 2025, është pjesë e një marrëveshjeje më të gjerë tregtare SHBA-BE. Por shumë detaje të këtij pakti nuk janë bërë të qarta dhe disa prej tyre janë ende pjesë e negociatave.
Federata Franceze e Eksportuesve të Verës dhe Pijeve Alkoolike tha se taksa mund të ulë një të katërtën e eksporteve vjetore të Francës nga ky sektor dhe të rrezikojë vendet e punës së rreth 600,000 personave.
Bashkimi Evropian po bën një përpjekje të fundit për të siguruar një përjashtim për disa sektorë specifikë, ndër të tjera edhe pijet alkoolike. Megjithatë, zyrtarët paralajmërojnë se një përjashtim i tillë nuk ka gjasa të përfshihet në listë.
Përveç tarifave, luhatjet në kurset e këmbimit valutor midis euros dhe dollarit i shtojnë sfidat ekonomike me të cilat përballen eksportuesit që kërkojnë të mbeten konkurrues në tregun amerikan.
“Ndikimi do të jetë edhe më i ashpër, pasi shoqërohet me rënien e dollarit amerikan në Shtetet e Bashkuara. Efekti i masave mund të çojë në 25% reduktim të shitjeve në Shtetet e Bashkuara,” shprehen ekspertët e sektorit.
Negociatat midis zyrtarëve të BE-së dhe SHBA-së pritet të vazhdojnë, me shpresën e arritjes së një vendimi më të favorshëm për këto produkte kryesore evropiane./Scan
