Kompania Microsoft ka publikuar videon “Windows 2030 Vision”, ku parashikon që ndërveprimi kryesor me sistemin operativ pas 5 vitesh do të bëhet përmes gjuhës natyrore, duke e bërë përdorimin e mausit dhe tastierës po aq të vjetruar sa DOS për gjeneratën Z sot. Në intervistën me David Weston, Zëvendës President i Microsoft për Enterprise & Security, kompania tregon vizionin e saj për të ardhmen e Windows.
Weston parashikon që brenda 5 viteve, kompanitë do të mund të “punësojnë” agjentë AI që do të veprojnë si ekspertë sigurie, duke marrë pjesë në takime Teams dhe duke komunikuar si njerëz të vërtetë. Ai thekson se AI do të kryejë punët e përsëritura, duke lënë njerëzit të fokusohen në detyra më kreative. Sipas tij, Windows-i i së ardhmes do të jetë multimodal: kompjuteri do të shohë atë që shohim ne, do të dëgjojë atë që dëgjojmë ne dhe do të kryejë detyra më komplekse përmes komandave zanore.
Microsoft ka investuar miliarda dollarë në AI, përfshirë mbi 13 miliardë $ në OpenAI dhe marrëveshjen 650 milionë $ me Inflection AI, duke shtuar funksione të inteligjencës artificiale në pothuajse çdo produkt. Megjithatë, vizioni i një Windows-i të komanduar nga zëri ka marrë reagime të ndryshme – videoja ka më shumë dislike sesa like. Skepticizmi vjen nga historia e premtimeve të mëdha të Microsoft-it që shpesh nuk realizohen plotësisht, si në rastin e Copilot dhe laptopëve Copilot+, apo funksionit Recall që shkaktoi polemika.
Idetë që mouse dhe tastierë do të bëhen të vjetruara deri në vitin 2030 duken të ekzagjeruara; ndoshta kjo do të ndodhë një ditë, por 5 vite duken një afat shumë i shkurtër për një ndryshim kaq drastik në mënyrën e ndërveprimit me kompjuterin.
