Sipërfaqet e kultivuara me vreshta në të gjithë Shqipërinë, kanë arritur të japin një prodhim prej 183 mijë ton rrush përgjatë vitit 2024.
Shifrat e INSTAT, tregojnë se prodhimi ka një rritje të lehtë me 3 ton në raport me 2023 por me rënie në krahasim me vitet e mëparshme. Sipërfaqja e mbjellë arrin në 9845 hektarë, me një rënie progresive nga viti në vit.
Por cilat janë arsyet?
“Praktikisht prodhimi nga fermeri ka një luhatje të vogël përsa i përket pak pjesës së kushteve klimatike dhe ndryshimit të kërkesë. Kantinat aktualisht janë të “detyruara” që të marrin varietete shqiptare që kanë identitet, dhe unë mendoj që kjo ka shkaktuar atë rënien e vogël sepse dhe fermerët vetë tani janë të bindur që nuk mund të prodhojnë një rrush të bardhë apo rrush të kuq pa identitet le të themi, një klon ndërkombëtar, por ka interes për produkt vendas. Është kjo faza që po risistemohet pak tregu, sepse kërkesa për produkt vendas është shumë e lartë. Fermerët tani janë të bindur 1005 që duke prodhuar një varietet që lidhet me territorin, që lidhet me zonën, besoj që e kanë shumë më të lehtë për ta dërguar tek përpunuesi”, shprehet enologu Rigers Kaçorri.
Nga ana tjetër, Kaçorri sqaron se duke qenë se kantinat po i japin prioritet cilësisë, janë zgjeruar ndjeshëm eksportet dhe prodhimi “Made in Albania” është më prezent në raftet e marketeve botërore.
“Unë mendoj që eksporti në tërësi për pjesën e produktit vendas është në rritje. Ka qenë çdo vit në rritje. Ka një kërkesë kudo, sidomos në Evropë për produkt vendas. Shqipëria eksporton në të gjithë vendet e BE, pastaj varet nga kantina se cilin treg ka më shumë, por që ka kërkesë shumë të madhe. Ne sot jemi në 18-20 për qind eksport. Dhe kërkesa nuk është vetëm nga shqiptarët që jetojnë jashtë, por pjesa identifikuese që ti ke dhe kjo na bën që të jemi konkurrues duke pasur një identitet në vendin ku eksportojmë”, thekson Kaçorri.
Sipas shifrave zyrtare të INSTAT, qarku me prodhimtarinë më të lartë të rrushit është Fieri me afro 39.2 mijë tonë, ndjekur nga Elbasani, Tirana, Vlora dhe Durrësi. Ndërsa qarku me prodhimtarinë më të ulët është Kukësi me 4800 ton./SCAN
