Bletaria në Shqipëri po merr gjithnjë e më shumë hov. Shifrat e fundit tregojnë një rritje të prodhimit të mjaltit, por edhe të numrit të koshereve në të gjithë vendin, duke treguar se sektori po zgjerohet dhe po tërheq gjithnjë e më shumë fermerë.
Sipas të dhënave të Agjencisë së Zhvillimit Bujqësor dhe Rural, në vitin 2025 në Shqipëri u prodhuan 6,299 tonë mjaltë, nga 5,940 tonë që ishte prodhimi një vit më parë. Në vetëm një vit, prodhimi u rrit me 359 tonë, ose rreth 6 për qind.
Rritja vihet re edhe te numri i koshereve. Në vitin 2025 në vend u regjistruan rreth 645 mijë koshere bletësh, ndërsa në vitin 2024 ishin rreth 587 mijë. Pra, brenda një viti janë shtuar rreth 58 mijë koshere, një tregues i qartë se gjithnjë e më shumë bletërritës po investojnë në zgjerimin e aktivitetit të tyre.
Në këtë zhvillim rol ka luajtur edhe mbështetja financiare e Skemës Kombëtare. Gjatë vitit 2025 përfituan 4,135 bletërritës, ndërsa skema parashikonte financim prej 1 mijë lekësh për zgjua për fermerët që kishin nga 50 deri në 150 zgjoje. Për pjesën mbi 150 zgjoje financimi ishte 50 për qind, ndërsa për fermerët e organizuar në bashkime operatorësh me të paktën shtatë anëtarë parashikohej financim i plotë.
Për vitin 2026, mbështetja për bletarinë është rritur ndjeshëm. Shuma është dyfishuar në 2 mijë lekë për zgjua, ndërsa është përgjysmuar edhe kufiri minimal i koshereve që duhet të ketë një fermer për të përfituar, duke zbritur në 25 zgjoje.
Ndryshimi i skemës duket se ka sjellë edhe më shumë interes nga bletërritësit. Për vitin 2026 janë regjistruar 7,016 aplikime në të gjithë Shqipërinë, megjithëse lista përfundimtare e përfituesve ende nuk është shpallur.
Sipas të dhënave, në vend ka rreth 12 mijë bletërritës, ndërsa rreth 3 mijë prej tyre kanë më shumë se 50 koshere. Për shumë prej tyre, bletaria nuk është thjesht një aktivitet bujqësor, por një burim i rëndësishëm të ardhurash dhe një traditë që po përshtatet me kërkesat e tregut.
Rritja e prodhimit, shtimi i koshereve dhe numri në rritje i aplikimeve për mbështetje tregojnë se bletaria shqiptare po kalon një periudhë zgjerimi. Nëse kjo tendencë vazhdon, sektori mund të ketë një peshë edhe më të madhe në ekonominë rurale dhe në prodhimin vendas të mjaltit.
