Për Gjeneratën Z, suksesi në karrierë nuk matet më domosdoshmërisht me një promovim. Gjithnjë e më shumë të rinj po zgjedhin një ekuilibër më të mirë mes jetës dhe punës, duke shmangur pozicionet drejtuese që sjellin përgjegjësi më të mëdha, orë më të gjata pune dhe presion të shtuar.
Ky fenomen po kthehet në një sfidë serioze për bizneset, të cilat po hasin vështirësi në përgatitjen e brezit të ardhshëm të drejtuesve. Sipas Tomasz Szklarski, CEO i Enpulse dhe ekspert për angazhimin e punonjësve, vetëm rreth 6% e përfaqësuesve të Gjeneratës Z synojnë të marrin role të larta drejtuese.
“Për organizatat dhe strukturat e tyre, kjo përbën një problem shumë të madh,” tha ai për Euronews.
Sipas tij, arsyeja kryesore është rritja e vazhdueshme e përgjegjësive që mbart një rol menaxherial. Në vitet e fundit, numri i punonjësve që raportojnë te një menaxher është rritur ndjeshëm. Madhësia mesatare e ekipeve është dyfishuar, nga rreth gjashtë në dymbëdhjetë persona. Kjo ka shtuar presionin mbi menaxherët, të cilët duhet të përmbushin objektivat e kompanisë, ndërsa njëkohësisht të mbështesin zhvillimin, motivimin dhe mirëqenien e ekipeve gjithnjë e më të mëdha.
“Gjenerata Z e ka peshuar me kujdes se çfarë do të thotë balanca mes jetës dhe punës krahas sakrificave që kërkon të jesh shef. Të rinjtë e shohin qartë barrën që shoqëron një pozicion drejtues,” shpjegon Szklarski.
Një sfidë veçanërisht e madhe për Evropën
Rënia e interesit për pozicionet drejtuese nuk është vetëm problem për kompani të veçanta, por një prirje globale që mund të godasë më fort Evropën, ku plakja e popullsisë po zvogëlon vazhdimisht fuqinë punëtore.
“Do të ketë gjithnjë e më pak njerëz në tregun e punës, veçanërisht në Europë. Nëse nuk përgatisim një brez të ri menaxherësh dhe nuk i inkurajojmë njerëzit të marrin përgjegjësi për drejtimin e ekipeve, organizatat do ta kenë gjithnjë e më të vështirë të ruajnë efikasitetin,” paralajmëron eksperti.
A mund ta zëvendësojë Inteligjenca Artificiale menaxherin?
Megjithëse Inteligjenca Artificiale po automatizon një numër në rritje procesesh në biznes, Szklarski nuk beson se ajo do ta zgjidhë mungesën e drejtuesve.
Sipas tij, mbetet e paqartë nëse punonjësit do të ishin të gatshëm të merrnin udhëzime nga algoritme apo nëse inteligjenca artificiale mund të përmbushte me sukses rolin e një menaxheri.
Drejtimi i ekipeve kërkon aftësi që teknologjia ende nuk mund t’i zëvendësojë plotësisht, si empatia, ndërtimi i marrëdhënieve, motivimi i punonjësve dhe marrja e vendimeve që marrin parasysh dimensionin njerëzor të organizatës./Businessmag
