Në botën e startup-eve, suksesi shpesh paraqitet si një histori e thjeshtë: një ide e mirë, pak guxim dhe një ngritje e shpejtë drejt suksesit. Por sipas sipërmarrësit dhe drejtuesit të kompanive teknologjike Mike Grossman, realiteti është shumë më kompleks.
Me rastin e publikimit të librit të tij më të ri, Failure Is an Option: Reflections of a Silicon Valley CEO, Grossman sfidon mitet më të përhapura të Silicon Valley-t dhe argumenton se dështimi nuk është përjashtim, por pjesë e pandashme e rrugëtimit sipërmarrës.
Gjatë afro tre dekadave si themelues dhe drejtues kompanish, ai ka parë qindra startup-e të lindin me ambicie të mëdha, por edhe shumë prej tyre të mos arrijnë rezultatet e pritura. Edhe vetë ka përjetuar situata të vështira.
Një nga kompanitë që drejtonte ishte pranë daljes në bursë, por pandemia e COVID-19 ndryshoi planet dhe procesi i shumëpritur nuk u realizua kurrë. Një tjetër biznes, i fokusuar në shërbime financiare për tregtarët, pa modelin e tij të biznesit të zhdukej brenda natës pas ndryshimeve ligjore në SHBA.
Sipas Grossman, një nga keqkuptimet më të mëdha është bindja se puna e palodhur garanton suksesin. Ai pranon se për vite me radhë ka besuar se rezultatet varen vetëm nga përkushtimi, por përvoja i tregoi se faktorë si koha, tregu apo ndryshimet e papritura mund të ndikojnë po aq sa puna vetë.
“Shumë sipërmarrës e lidhin identitetin e tyre me rezultatet e biznesit. Kur diçka nuk funksionon, ata e shohin si një dështim personal. Por nuk është kështu”, shprehet ai.
Një tjetër problem, sipas tij, është se historia e startup-eve zakonisht tregon vetëm suksesin final, ndërsa lë në hije gabimet, eksperimentet e dështuara dhe ndryshimet e vazhdueshme të drejtimit që ndodhin gjatë rrugës.
Grossman thekson se edhe kompanitë që përfundimisht arrijnë sukses kalojnë përmes dështimeve të shumta. Në këtë kuptim, ai argumenton se dështimi nuk duhet parë si fundi i një rruge, por si një mundësi për të mësuar, për t’u përshtatur dhe për të provuar qasje të reja.
Një nga gabimet më të mëdha që ai pranon se ka bërë gjatë karrierës është investimi i tepërt në ndërtimin e produkteve pa marrë më parë mjaftueshëm reagime nga tregu. Me kalimin e kohës, ai mësoi se testimi i hershëm dhe marrja e feedback-ut real nga klientët janë thelbësore për të shmangur humbjen e kohës dhe burimeve.
Mesazhi kryesor që ai përcjell për sipërmarrësit është i thjeshtë: fokusohuni te gjërat që mund të kontrolloni dhe pranoni se jo çdo rezultat varet nga ju. Në biznes, si edhe në jetë, dështimet janë të pashmangshme, por mënyra se si reagojmë ndaj tyre është ajo që përcakton rrugën përpara.
Sipas Grossman, mësimi më i rëndësishëm që ka nxjerrë nga karriera e tij është se dështimi nuk është një ngjarje e veçantë, por një gjendje e vazhdueshme e sipërmarrjes. Pranimi i kësaj të vërtete, thotë ai, e bën më të lehtë të ecësh përpara dhe të vazhdosh të ndërtosh./Inc
