Gratë përbëjnë shumicën e punonjësve në sektorin e shëndetësisë në Evropë, por pavarësisht kësaj, vazhdojnë të paguhen dukshëm më pak se burrat. Sipas një raporti të ri të Organizatës Botërore të Shëndetësisë (OBSH), gratë në këtë sektor fitojnë mesatarisht 19% më pak për orë.
Në Rajonin Europian të OBSH-së, gratë përbëjnë rreth 77% të fuqisë punëtore në shëndetësi dhe kujdes, ndërsa zënë vetëm 55% të vendeve me të ardhurat më të larta.
Hendeku bëhet edhe më i dukshëm në nivelet më të larta të pagave. Sipas raportit, diferenca shkon nga rreth 2% te punonjësit me pagat më të ulëta në mbi 22% në pjesën më të lartë të shpërndarjes së pagave.
Një pjesë e këtij hendeku lidhet me faktorë si mosha, arsimi, puna me kohë të plotë ose të pjesshme dhe punësimi në sektorin publik apo privat. Por edhe pasi këta faktorë merren parasysh, mbetet një diferencë e konsiderueshme: hendeku për pagën për orë zbret në 6%, ndërsa ai i pagës mujore në 10%.
OBSH e lidh pjesën e mbetur me faktorë më të thellë, si nënvlerësimi i punës së kujdesit, ndarja gjinore e profesioneve dhe praktikat e pagave.
Sipas organizatës, kjo pabarazi nuk ndikon vetëm te të ardhurat mujore të grave, por edhe te siguria e tyre financiare gjatë gjithë jetës, përfshirë pensionet. Për këtë arsye, OBSH kërkon më shumë transparencë në paga, përfaqësim më të madh të grave në pozicionet drejtuese dhe masa që adresojnë stereotipet gjinore në tregun e punës.
