Sipërmarrësit shqiptaro-amerikanë Neviana Zhgaba dhe Ardian Llomi kanë shënuar një tjetër sukses në Shtetet e Bashkuara. Kantina e tyre Aquila’s Nest Vineyards, në Connecticut, është renditur në vendin e pestë në klasifikimin kombëtar të “Best Wine Tasting Room”, pjesë e 2026 USA TODAY 10Best Readers’ Choice Awards.
Kjo arritje e vendos kantinën me pronësi shqiptare mes 10 destinacioneve më të vlerësuara për degustimin e verës në SHBA. Aquila’s Nest u përzgjodh fillimisht mes 20 destinacioneve nga një panel gazetarësh, redaktorësh, shkrimtarësh dhe ekspertësh të verës, ndërsa renditja përfundimtare u përcaktua përmes votimit publik.
Ky është viti i parë që Aquila’s Nest përfshihet në këtë klasifikim kombëtar, ndërsa ishte e vetmja kantinë nga New England që u rendit në Top 10.
Nga një fermë 200-vjeçare në një destinacion të verës dhe kulturës
E vendosur në Newtown, Connecticut, Aquila’s Nest shtrihet në një sipërfaqe prej rreth 41 akrash, në një pronë që dikur ishte një fermë dhe ka një histori rreth 200-vjeçare.
Neviana Zhgaba dhe Ardian Llomi e blenë pronën në vitin 2015, fillimisht me idenë për ta përdorur si një hapësirë për familjen e tyre. Me kalimin e kohës, ata panë potencialin për ta transformuar atë në një destinacion ku njerëzit mund të mblidheshin rreth verës, artit, kulturës dhe natyrës.
Kantina hapi dyert në vitin 2020 dhe që prej atëherë është zhvilluar si një destinacion me një koncept që ndërthur prodhimin e verës me eksperienca kulturore dhe artistike.
Rrënjët shqiptare në identitetin e kantinës
Të dy sipërmarrësit janë rritur në Shqipëri, dhe prejardhja e tyre ka ndikuar në mënyrën se si është konceptuar Aquila’s Nest.
Kantina e ndërthur trashëgiminë mesdhetare me elemente të mitologjisë, artit dhe astronomisë, duke krijuar një identitet të veçantë për markën.
Kjo qasje reflektohet edhe te verërat. Sipas Aquila’s Nest, secila prej tyre mban emrin e një gruaje nga historia ose mitologjia e lashtë, ndërsa etiketat janë të konceptuara me motive që lidhen me yjësitë.
Në këtë mënyrë, degustimi nuk kufizohet vetëm te shijimi i verës, por shoqërohet me një histori dhe koncept artistik.
Një hapësirë që shkon përtej degustimit të verës
Dhoma e degustimit ka një sipërfaqe prej rreth 2,000 metrash katrorë dhe përfshin edhe një piano të madhe. Në territorin e kantinës ndodhen gazebot private, hapësira me vatra zjarri dhe zona me pamje nga vreshtat.
Aquila’s Nest organizon gjithashtu muzikë live, aktivitete kulinarie, vëzhgim të yjeve, aktivitete kulturore dhe evente sezonale.
Pikërisht kombinimi mes verërave të prodhuara në kantinë dhe eksperiencës që ofron e ka ndihmuar Aquila’s Nest të tërheqë vëmendjen e USA TODAY dhe të renditet mes destinacioneve më të mira të këtij lloji në SHBA.
Një seri vlerësimesh në nivel kombëtar
Renditja e fundit i shtohet një serie vlerësimesh të rëndësishme të marra nga biznesi shqiptaro-amerikan.
Në vitin 2023, Aquila’s Nest u përzgjodh mes 70 bizneseve të vogla më të mira në SHBA nga U.S. Chamber of Commerce, në një përzgjedhje që përfshiu kompani nga të 50 shtetet amerikane, Washington D.C. dhe Puerto Rico.
Në vitin 2024, kompania u shpall Connecticut Manufacturer of the Year përmes Small Business Administration (SBA), ndërsa po atë vit mori edhe National Small Business Award.
Aquila’s Nest është vlerësuar gjithashtu nga Connecticut Magazine si një nga kantinat më të mira të verës në Connecticut, përfshirë edhe çmimin për vitin 2025.
Fokus edhe te qëndrueshmëria
Përveç prodhimit të verës dhe aktiviteteve turistike, Aquila’s Nest ka integruar edhe qëndrueshmërinë mjedisore në modelin e saj të biznesit.
Kantina është certifikuar Climate Neutral, duke reflektuar përpjekjet për reduktimin dhe kompensimin e gjurmës së saj të karbonit.
Themeluesit e kanë lidhur këtë qasje edhe me vlerat e formuara gjatë fëmijërisë së tyre në Shqipëri, ku bujqësia dhe marrëdhënia me tokën ishin pjesë e jetës së përditshme.
Suksesi i Neviana Zhgaba dhe Ardian Llomit është një tjetër shembull i sipërmarrjes shqiptare në diasporë, duke treguar se një pronë e transformuar me vizion dhe një koncept të qartë mund të kthehet në një destinacion me njohje kombëtare në tregun amerikan./Atlantiku
Marrë nga VASPAS
