Edicioni i 11-të i Simpoziumit Ndërkombëtar të Artit “Struga ’26” do të zhvillohet nga 29 gushti deri më 3 shtator 2026, në qytetin e Strugës, duke mbledhur artistë nga vende të ndryshme të botës.
Krahas krijimtarisë artistike, programi i këtij edicioni sjell një sërë aktivitetesh kulturore dhe artistike, përfshirë performanca, punëtori për fëmijë, vizita kulturore, aktivitete në natyrë dhe evente të hapura për publikun.
Drejtori i Simpoziumit, Burhan Ahmeti, e cilëson edicionin e 11-të si një vazhdimësi të rëndësishme të këtij manifestimi, por edhe si një hap të ri drejt ndërkombëtarizimit të tij.
“Edicioni i 11-të është për ne një vazhdimësi shumë e rëndësishme, por njëkohësisht edhe një hap përpara në ndërkombëtarizimin e Simpoziumit. Nga viti në vit kemi arritur të krijojmë një familje të madhe artistësh nga vende, kultura dhe tradita të ndryshme. Këtë vit kemi synuar që programi të jetë edhe më dinamik dhe më i hapur ndaj publikut.”
Gjatë gjashtë ditëve, artistët pjesëmarrës do të krijojnë vepra të reja, ndërsa do të kenë mundësinë të prezantojnë krijimtarinë dhe eksperiencat e tyre artistike.
Një nga momentet e veçanta të programit do të jetë performanca artistike e Refki Gollopenit, në Qendrën NABIZI, në ambient të hapur. Programi përfshin gjithashtu vizita në Manastirin e Shën Naumit, Muzeun mbi Ujë dhe qytetin e Ohrit, aktivitete në natyrë, piknik, si dhe një punëtori artistike për fëmijë.
Simpoziumi do të përmbyllet me ekspozitën e veprave të realizuara gjatë qëndrimit të artistëve, e cila do të prezantohet në Qendrën e Kulturës në Strugë, në ambient të hapur.
“Art Connects Cultures” – Arti lidh kulturat
Motoja e këtij edicioni, “Art Connects Cultures” – “Arti lidh kulturat”, përmbledh filozofinë mbi të cilën është ndërtuar Simpoziumi gjatë 11 edicioneve.
Struga është shndërruar ndër vite në një pikë takimi të artistëve, kulturave, traditave dhe shkollave të ndryshme artistike.
“Në Simpozium nuk takohen vetëm artistë; takohen gjuhë, kultura, tradita, shkolla dhe mënyra të ndryshme të të menduarit dhe të krijuarit. Artistët vijnë nga vende të ndryshme të botës, por për gjashtë ditë jetojnë dhe krijojnë së bashku në të njëjtën hapësirë. Pikërisht aty ku ekzistojnë barriera gjuhësore, arti bëhet gjuha e përbashkët.”
Gjatë edicioneve të kaluara, në Simpozium kanë marrë pjesë qindra artistë nga dhjetëra vende të botës, duke krijuar një rrjet të gjerë miqësish dhe bashkëpunimesh ndërkombëtare.
Për organizatorët, një nga qëllimet kryesore është që artistët ndërkombëtarë të njohin jo vetëm Simpoziumin, por edhe Strugën, Ohrin, Liqenin e Ohrit, kulturën, trashëgiminë dhe mikpritjen e kësaj treve.
Një koleksion që pasurohet çdo vit
Pas përfundimit të Simpoziumit nuk mbeten vetëm kujtimet dhe fotografitë. Mbeten veprat e artit, kontaktet profesionale, miqësitë dhe bashkëpunimet ndërkombëtare.
Veprat e krijuara ndër vite formojnë një koleksion që pasurohet vazhdimisht dhe përfaqëson një arkiv vizual të historisë së Simpoziumit. Çdo vepër mbart identitetin e artistit, vendin prej nga vjen dhe një pjesë të përvojës së tij në Strugë.
Nga njohjet e krijuara gjatë Simpoziumit kanë lindur ekspozita, projekte të përbashkëta, vizita artistike dhe bashkëpunime të reja ndërkombëtare.
Siç thekson Ahmeti, Simpoziumi nuk shihet vetëm si një aktivitet gjashtëditor, por si një proces që nis në Strugë dhe vazhdon të jetojë në vende të ndryshme të botës përmes artistëve dhe veprave të tyre.
“Në fund, suksesi më i madh për ne është kur një artist largohet nga Struga jo vetëm me një vepër të re, por me miq të rinj, ide të reja dhe me dëshirën për t’u rikthyer përsëri. Pikërisht këtu merr kuptimin e plotë edhe motoja jonë: ‘Art Connects Cultures’.”
Struga ’26, një takim i artit, kulturave dhe njerëzve nga e gjithë bota.
