Samir Mane ishte ndër folësit e ftuar në konferencën AllWeb, që u zhvillua në Tiranë, një prej konferencave të marketingut digjital që mbledh folës dhe ekspertë nga e gjithë bota.
Gjatë fjalës së tij, Mane bëri një deklaratë të fuqishme mbi të ardhmen e punës, duke parashikuar se brenda 4-5 viteve të ardhshme, ndoshta deri në vitin 2030, java katërditore e punës mund të bëhet realitet.
“Besoj se në 4-5 vitet e ardhshme, ndoshta edhe në vitin 2030, të gjithë do të punojnë katër ditë në javë. Dhe kjo nuk është thjesht një ide. Në kompanitë e Grupit BALFIN kemi filluar të punojmë për ta arritur këtë”, u shpreh Mane.
Duke folur për Inteligjencën Artificiale, ai theksoi se ajo duhet të jetë një e mirë publike, e aksesueshme për të gjithë, në mënyrë që t’i shërbejë njerëzimit.
Mane u shfaq optimist për ndikimin e AI në të ardhmen, duke nënvizuar se teknologjia do të sjellë ndryshime të mëdha në tregun e punës. Sipas tij, disa profesione dhe vende pune do të zëvendësohen, por numri i vendeve të reja të punës që do të krijohen do të jetë më i madh./businessmag.al
