Ministrja Frida Krifca njoftoi programin e ri për promovimin e tregtisë, i cili do të mbështesë sektorin e agrobiznesit në Shqipëri me synim krijimin e një rritjeje të qëndrueshme të eksporteve.
“Më vjen mirë që një agjenci prestigjioze, nën drejtimin e Kombeve të Bashkuara dhe të Organizatës Botërore të Tregtisë, i bashkohet punës për të arritur objektivin tonë për produkte shqiptare cilësore dhe konkurruese. International Trade Agency do të jetë energjia më e re që ne po çojmë tek disa nga kampionët e prodhimit dhe të eksporteve tona siç janë: fruta-perimet, vaji i ullirit dhe bimët mjekësore”, tha Krifca.
Bashkëpunimi mes ministrisë së bujqësisë dhe agjensisë ndërkombëtare të tregtisë për të përmirësuar eksportet e agropërpunimit.
“Bujqësia shqiptare po shndërrohet në një eksportues të fuqishëm rajonal të produkteve të freskëta me 500 milionë dollarë eksporte për vitin 2022 duke përmbushur ritmin e rritjes së vendosur si objektiv madhor, atë të 1 miliard dollarë eksporte në vitin 2030”, u shpreh ministrja.
Me programin e ri të financuar nga qeveria zvicerane, Qendra Ndërkombëtare e Tregtisë do të punojë ngushtë me ndërmarrjet e vogla dhe të mesme, me organizatat që mbështesin biznesin, dhe me Ministrinë e Bujqësisë dhe Zhvillimit Rural, për të forcuar kapacitetet, sistemet dhe rregullat me qëllim që të rriten eksportet bujqësore dhe ushqimore, dhe të përmirësohet gama dhe cilësia e tyre.
