Një tjetër sukses ndërkombëtar për këngëtaren shqiptare, Dua Lipa. Ylli i muzikës botërore është zgjedhur si ambasadore e re globale e markës ikonike italiane të luksit, Bvlgari.
Lajmi u konfirmua nga vetë drejtuesit e shtëpisë së modës. Laura Burdese, e cila nga 1 korriku do të marrë drejtimin ekzekutiv të Bvlgari-t, duke zëvendësuar Jean-Christophe Babin, ka zbuluar detajet e këtij partneriteti të ri. Sipas saj, Dua Lipa përfaqëson më së miri vizionin bashkëkohor të markës.
“Dua Lipa mishëron një koncept modern të fuqizimit dhe lirisë, vlera që përputhen thellësisht me frymën e Bvlgari-t,” u shpreh Burdese, duke shtuar se ndihet e entuziazmuar për të nisur “këtë kapitull të ri emocionues” krahas artistes.
Nga ana e saj, këngëtarja dhe kantautorja shqiptare nuk ka kursyer entuziazmin për bashkëpunimin e ri. Për Dua Lipën, të punosh me Bvlgari-n është diçka shumë e veçantë. Ajo theksoi se ndihet e lumtur që bëhet pjesë e një shtëpie që përfaqëson vetëbesim, kreativitet dhe feminitet modern.
“Bizhuteritë e Bvlgari-t janë gjithmonë prekja e fundit perfekte. Ato kanë fuqinë ta shndërrojnë një veshje të thjeshtë në një moment të vërtetë, plot shkëlqim dhe personalitet,” tha Dua Lipa gjatë njoftimit për shtyp.
Ky emërim vjen në një moment kyç për të dyja palët; për Bvlgari-n në prag të një ndryshimi drejtuesish dhe për Dua Lipën si një konfirmim i statusit të saj si një ndër ikonat më me ndikim të modës dhe kulturës pop në botë.
