Google është përballur me një gjobë prej 403 milionë eurosh nga autoriteti irlandez për mbrojtjen e të dhënave, pas një hetimi mbi mënyrën se si kompania ka mbledhur dhe përpunuar informacionin mbi vendndodhjen e përdoruesve.
Çështja lidhet me disa prej funksioneve të Google, përfshirë Web & App Activity, Location History dhe Location Accuracy. Sipas autoritetit irlandez, kompania nuk ka arritur të dëshmojë se përpunimi i të dhënave të vendndodhjes ka qenë në çdo rast i ligjshëm, i drejtë dhe transparent ndaj përdoruesve.
Rregullatori ka konstatuar gjithashtu probleme në mënyrën se si përdoruesit informoheshin për mbledhjen dhe përdorimin e këtyre të dhënave. Sipas tij, Google i ka ruajtur informacionet e vendndodhjes për një periudhë më të gjatë nga sa ishte e nevojshme.
Të dhënat e vendndodhjes konsiderohen veçanërisht të ndjeshme, pasi mund të tregojnë shumë për jetën e përditshme të një personi, përfshirë vendet që viziton, interesat e tij dhe aktivitetet që kryen. Autoriteti irlandez vlerëson se mungesa e transparencës mund të ketë bërë që përdoruesit të mos e kuptonin plotësisht se si mund të përdorej informacioni i tyre, përfshirë edhe për reklama të personalizuara.
Përveç gjobës së majme, Google është urdhëruar të ndryshojë mënyrën e përpunimit të të dhënave dhe të përshtatë praktikat e saj me rregullat europiane të mbrojtjes së të dhënave brenda gjashtë muajve.
Vendimi është marrë pas bashkëpunimit të autoritetit irlandez me homologët e tij në vende të tjera të Bashkimit Europian. Gjoba prej 403 milionë eurosh i shtohet një serie të gjatë masash dhe ndëshkimesh ndaj Google në Europë, në çështje që lidhen me konkurrencën, reklamimin dhe mbrojtjen e të dhënave personale.
