Në momentet më të vështira të jetës mund të ndodhë Ndryshimi i Madh. Greta Dedaj është një prej vajzave me shumë kurajo që nuk ndalen para asgjëje dhe ecin përpara në realizimin e endërrave të tyre. Në një intervistë për Probizz.al ajo tregon për linjen e saj të veshjeve EONIAN dhe suksesin që ka në Europë.
Kur nisi pasioni juaj për dizajnin, modën etc? Cfarë ju nxiti të krijonit një linjë veshjesh?
Unë kam mbaruar bachelorin për ART AND DESIGN tek POLIS në Tiranë dhe masterin për Interior Design në Firenze të Italisë.
Favori i kësaj degë është që të stërvit syrin që ti shikosh të gjitha gjërat nga ana estetike. Nga gjëja më bazike që hasim në përditshmëri deri tek gjërat më me rëndësi.
Sot imazhi për njerëzit është shumë e rëndësishme dhe mundem të them që aty nisi çdo gjë. Te fakti që sot njerëzit duan të jenë të veshur bukur, por njëkohësisht jeta është bërë aq e shpejtë sa mendoj që nuk kemi mjaftushëm kohë për të dedikuar 1 orë çdo mëngjes duke menduar se çfarë do veshim dhe më kryesorja për ti hekurosur. Gjëja e parë që bëra ishte të studjoja materialet duke u munduar të gjeja materiale që i rezistojnë kohës dhe që nuk krijojnë rrudhë. Nga këto dy faktor nisi çdo gjë. Doja të bëja një brand me materiale cilësore gjë që sot ose do paguash shumë që të kesh produkt cilësor ose do paguash një vlerë mesatare për një produkt që do e veshësh vetëm dy herë. Mund të them me bindje të plotë që unë ja arrita që të nxjerr në treg një produkt me cilësi europiane dhe me një çmim te arsyeshëm për standartin tonë të jetesës.
Pse emërtimi “Eonian” ? A ka një simbolikë të veçantë?
Brandi jonë quhet EONIAN, është fjalë e vjetër grekë dhe do të thotë PËRGJITHMONË. Ky emër mban një peshë shumë të madhe për mua. Kur kam vendos që brandin tim ta titulloj Eonian kam qenë në një fazë shumë të vështirë të jetës time. Kam qenë në një luftë me jetën, pasi prej 7 vitesh jam diagnostikuar me kancer. Dhe në keto 7 vite mesazhi më i madh dhe më me vlerë që unë kam marr ka qenë, që pavarësisht çdo gjëje që ne mundemi të kalojmë në jetë, më e rëndësishme është që ne të lemë dicka ketu. Një shenjë që do na përfaqesojë PËRGJITHMONË.
Pse zgjodhët që fillimit ta nisnit projektin tuaj në Europë? A ka më shumë mundësi për të operuar në botën e modës?
Pjesa e madhe e produkteve tona bëhën në Europë, një pjesë shumë e vogël krijohet në Shqipëri, tek punishtja që i është dedikuar brandit tonë 100%.
Cili ka qenë feedback-u pasi u fut në treg Eonian?
Brandi jonë është futur me kualitet shumë të lartë të produkteve, me të njëjtin kualitet vazhdojmë edhe sot mbas 2 vitesh që jemi në treg. Mund të them me plot bindje që feedback-u ka qenë shumë i lartë. Klientët tanë kanë kuptuar që për ne thelbësore është minimalizmi dhe cilësia, dhe për keto dy arsye tashmë na besojnë stilin e tyre.
Çfarë i sugjeroni të rinjve që kanë pasion dhe duan të guxojnë në ëndrrat e tyre.
Une mesazhin nuk dua ta jap thjeshtë për njerëzit që kanë një ëndërr. Unë mesazhin dua ta jap për ata që jeta është treguar pak e padrejtë. Mos harroni që ne kemi fatin të lindim për herë të dytë dhe kjo na jep mundësinë të mos lemë asnjë ëndërr pa realizuar. Asgjë nuk është e pamundur .
Në momentet më të vështira të jetës mund të ndodhë Ndryshimi i Madh. Greta Dedaj është një prej vajzave me shumë kurajo që nuk ndalen para asgjëje dhe ecin përpara në realizimin e endërrave të tyre. Në një intervistë për Probizz.al ajo tregon për linjen e saj të veshjeve EONIAN dhe suksesin që ka në Europë.
