Ekosistemi i startup-eve në Shqipëri po sjell gjithnjë e më shumë ide që synojnë të zgjidhin probleme konkrete të përditshmërisë. Mes projekteve që u prezantuan në Women Startup Competition Albania, një prej tyre vjen me fokus të qartë te familja dhe edukimi i fëmijëve.
Kidoor është një platformë që po zhvillohet si aplikacion mobile dhe platformë web, me synimin për t’u ofruar prindërve informacion, mjete dhe përmbajtje të besueshme për të orientuar zhvillimin e fëmijëve në epokën digjitale. Projekti ka lindur nga eksperienca disa vjeçare e ekipit të Coddy School Tirana, i cili, përmes punës së përditshme me qindra familje, ka identifikuar nevojën për një hapësirë të vetme ku prindërit të gjejnë këshilla, aktivitete dhe burime të organizuara sipas moshës dhe nevojave të fëmijëve.
Në këtë intervistë, ekipi i Kidoor tregon si lindi ideja, cilin problem synon të zgjidhë, çfarë do të ofrojë platforma në fazën e parë dhe cili është vizioni për ta kthyer atë në një ekosistem të dedikuar për familjet në Shqipëri dhe më gjerë.
Çfarë është Kidoor?
Kidoor është një platformë që po zhvillohet si aplikacion mobile dhe platformë web, me synimin për të mbështetur prindërit në rritjen dhe edukimin e fëmijëve të tyre. Ai lindi nga eksperienca jonë disavjeçare në Coddy School Tirana dhe nga komunikimi i vazhdueshëm me qindra familje, të cilat çdo ditë ndajnë me ne të njëjtat sfida dhe pyetje.
Versioni i parë i Kidoor do të fokusohet te edukimi digjital, sepse besojmë se kjo është një nga nevojat më të mëdha të familjeve sot. Më pas platforma do të zgjerohet gradualisht me kategori të tjera që lidhen me zhvillimin, mirëqenien dhe aktivitetet e fëmijëve.
Cili është problemi kryesor që synon të zgjidhë Kidoor në tregun e edukimit digjital për fëmijë dhe familje?
Sot teknologjia është bërë pjesë e pandashme e jetës së fëmijëve, por shumë prindër ende nuk ndihen të orientuar se si ta përdorin atë në mënyrë të dobishme. Ata kërkojnë informacion në vende të ndryshme, marrin këshilla të ndryshme dhe shpesh ndihen të mbingarkuar.
Kidoor synon të zgjidhë pikërisht këtë problem. Ne duam të krijojmë një platformë ku prindërit të gjejnë informacion të besueshëm, aktivitete dhe përmbajtje edukative të organizuara sipas moshës dhe nevojave të fëmijës, pa humbur kohë duke kërkuar në dhjetë vende të ndryshme.
Si funksionon platforma dhe cilat janë veçoritë kryesore të saj?
Kidoor do të jetë i aksesueshëm si aplikacion mobile dhe platformë web.
Në fazën e parë, fokusi do të jetë te edukimi digjital, ku prindërit dhe fëmijët do të kenë akses në materiale edukative, aktivitete praktike, sfida kreative dhe rekomandime për përdorimin e sigurt dhe produktiv të teknologjisë.
Me zhvillimin e platformës do të shtohen kategori të tjera si psikologjia, parenting, aktivitetet për fëmijë, shëndeti, eventet, marketplace dhe shumë funksionalitete të tjera që do ta bëjnë Kidoor një platformë të plotë për familjet.
Çfarë e dallon Kidoor nga platformat ekzistuese të edukimit online dhe aplikacionet e ngjashme në treg?
Ajo që e bën Kidoor ndryshe është se ai nuk është ndërtuar mbi teori, por mbi eksperiencë reale.
Ne nuk kemi filluar nga pyetja “Çfarë aplikacioni mund të ndërtojmë?”, por nga pyetja “Çfarë u mungon prindërve?”. Përgjigjet i kemi marrë çdo ditë në Coddy School Tirana, duke biseduar me familjet dhe duke kuptuar sfidat që hasin.
Gjithashtu, Kidoor nuk synon të jetë vetëm një platformë mësimore. Ai synon të jetë një partner për prindërit, që i ndihmon të marrin vendime më të informuara dhe ta përdorin teknologjinë si një mjet zhvillimi, jo thjesht argëtimi.
Si është ndërtuar modeli i biznesit të Kidoor dhe cilat janë burimet kryesore të të ardhurave që pritet të gjenerohen?
Modeli i biznesit është menduar të jetë i qëndrueshëm dhe i diversifikuar.
Platforma do të ofrojë një pjesë të përmbajtjes falas, ndërsa funksionalitete dhe shërbime të avancuara do të jenë të aksesueshme përmes abonimeve premium. Gjithashtu, planifikojmë partneritete me qendra edukative, institucione, ekspertë dhe biznese që ofrojnë shërbime për familjet dhe fëmijët.
Synimi ynë është që Kidoor të krijojë vlerë reale për përdoruesit dhe njëkohësisht të ndërtojë një model të qëndrueshëm financiar.
Si është strukturuar ekipi i projektit dhe çfarë roli luan secili anëtar në zhvillimin dhe funksionimin e platformës?
Kidoor zhvillohet nga një ekip që bashkon ekspertizën në teknologji, edukim dhe menaxhim projektesh.
Unë koordinoj zhvillimin e projektit dhe drejtimin strategjik të platformës. Ekipi përfshin zhvillues software, specialistë të UX/UI, profesionistë të marketingut dhe ekspertë të edukimit, të cilët kontribuojnë në ndërtimin e përmbajtjes dhe funksionaliteteve të platformës.
Një rol shumë të rëndësishëm kanë edhe prindërit e komunitetit të Coddy School Tirana. Ata janë përdoruesit e parë që do të testojnë platformën dhe feedback-u i tyre do të na ndihmojë ta përmirësojmë vazhdimisht.
Cilat janë objektivat tuaja?
Objektivi ynë i parë është të lançojmë versionin e parë të Kidoor me fokus te edukimi digjital dhe ta testojmë atë me komunitetin tonë ekzistues të prindërve.
Më pas synojmë ta zgjerojmë platformën me kategori dhe shërbime të reja, duke krijuar një mjedis ku prindërit mund të gjejnë gjithçka që lidhet me zhvillimin e fëmijëve.
Vizioni ynë afatgjatë është që Kidoor të bëhet platforma kryesore për familjet në Shqipëri dhe më pas në rajon. Ne duam që prindërit ta hapin Kidoor çdo ditë jo sepse “duhet”, por sepse e dinë që aty do të gjejnë një zgjidhje, një ide ose një mundësi që e bën më të lehtë dhe më të bukur rrugëtimin e tyre si prindër.
