Bluesky, platformë e mediave sociale po njeh një rritje kohët e fundit. Përllogaritet qe ka tejkaluar mbi 22 milionë përdorues dhe sipas mediave kjo i atribuohet pakënaqësive që janë krijuar nga platforma X e cila menaxhohet nga miliarderi Elon Musk.
Platforma e mediave sociale Bluesky u hap në vitin 2019 si një projekt eksperimental brenda rrjetit Twitter dhe drejtohej nga bashkëthemeluesi dhe ish- shefi ekzekutiv i tij, Jack Dorsey.
Pas zgjedhjeve presidenciale të vitit 2024, platforma është bërë një alternativë popullore ndaj rrjetit X.
Në javën e parë pas zgjedhjeve, platforma pati afro një milion përdorues të rinj në ditë dhe aktualisht Bluesky tërheq mbi 180 mijë përdorues në ditë.
Pavarësisht largimeve, ekspertët thonë se kompania X ka një pozitë mbizotëruese në treg me mbi 300 milionë përdorues aktivë çdo muaj.
