Paratë që emigrantët shqiptarë dërgojnë për familjet e tyre në Shqipëri vijojnë të shënojnë rritje, duke mbetur një ndër burimet më të rëndësishme të hyrjes së valutës në ekonomi. Sipas të dhënave të “Bankës së Shqipërisë”, remitancat arritën në 274.3 milionë euro në tremujorin e parë të vitit 2026, niveli më i lartë i regjistruar ndonjëherë për këtë periudhë.
Krahasuar me të njëjtën periudhë të një viti më parë, kur remitancat ishin 250.7 milionë euro, prurjet u rritën me rreth 9%, ndërsa në raport me vitin 2024 rritja arrin në mbi 13%. Tendenca pozitive është bërë më e fortë pas pandemisë, me flukse që janë rritur nga viti në vit dhe kanë arritur nivele rekord.
Rritja e remitancave lidhet edhe me zgjerimin e diasporës shqiptare. Të dhënat demografike tregojnë se rënia e popullsisë në vend vijon të ndikohet kryesisht nga emigracioni. Edhe pse në vitin 2025 shtesa natyrore e popullsisë ishte pozitive, me 1.147 lindje më shumë se vdekje, migracioni neto mbeti negativ me 28.531 persona, duke konfirmuar se largimet jashtë vendit vijojnë të jenë faktori kryesor i tkurrjes së popullsisë.
Sipas publikimeve të mëparshme nga INSTAT, të dhënat tregojnë se burimi kryesor i remitancave mbeten komunitetet shqiptare në Itali dhe Greqi, pra aty ku ka edhe më shumë emigrantë. Këto flukse financiare përbëjnë një mbështetje të rëndësishme për konsumin e familjeve dhe një burim të qëndrueshëm të valutës për ekonominë shqiptare.
Megjithatë rekordet e remitancave vijnë në një periudhë kur monedha europiane ka prekur nivelin më të ulët historik, duke bërë që familjet që mbahen nga të ardhurat nga jashtë të përfitojnë më pak./Scan
