Aplikacioni për ndarjen e videove TikTok është zotuar të tërheqë përgjithmonë programin e tij të shpërblimeve TikTok Lite nga tregu i BE-së dhe të ndalojë shpërndarjen e funksioneve të ngjashme të shpërblimeve.
TikTok u urdhërua në prill nga Komisioni që të pezullonte aplikacionin pasi kompania filloi të përdorë funksionalitetet në Francë dhe Spanjë. Ekzekutivi i BE-së ishte i shqetësuar për ndikimin e tij të mundshëm në shëndetin mendor të përdoruesve, veçanërisht në lidhje me stimulimin e mundshëm të sjelljes së varësisë.
Nëpërmjet TikTok Lite, përdoruesit mbi 18 vjeç mund të fitojnë pikë nën një të ashtuquajtur “Program shpërblimi”, ndërsa kryejnë detyra të caktuara në aplikacion, të tilla si shikimi i videove, pëlqimi i përmbajtjes, ndjekja e krijuesve ose u dërgojnë ftesa miqve.
Këto pikë mund të shkëmbehen për shpërblime, të tilla si kuponat e Amazon, kartat e dhuratave nëpërmjet PayPal ose monedhës së TikTok. Kompania pezulloi vullnetarisht prezantimin e aplikacionit TikTok Lite, në pritje të rezultatit të hetimit.
“Koha e disponueshme e trurit të të rinjve evropianë nuk është një monedhë për mediat sociale – dhe nuk do të jetë kurrë. Ne kemi marrë si vendim tërheqjen e përhershme të programit të Shpërblimeve TikTok Lite, i cili mund të kishte pasur pasoja,” tha në një deklaratë Thierry Breton, Komisioneri i BE-së.
Një zëdhënës i TikTok tha për Euronews se kompania është e kënaqur që ka arritur një zgjidhje miqësore.
Përkthyer dhe përshtatur nga Euronews për Probizz.al
