Shoqata e Artistëve Figurativë të Vushtrrisë, në bashkëpunim me OJQ “VICIANA 2019”, e financuar nga Ministria e Kulturës, Rinisë dhe Sportit, e mbështetur nga Komuna e Vushtrrisë dhe sponsorizuar nga “Koshi Group”, organizon Koloninë e Artit “Muaji i Pikturës” – Edicioni i VII-të, që këtë vit zhvillohet nga 30 tetori deri më 02 nëntor 2025, duke e kthyer Vushtrrinë në një qendër të gjallë të artit figurativ dhe të bashkimit kulturor.
Festivali do të hapet me artin dhe energjinë e artistëve të rinj të Gjimnazit “Eqrem Çabej” – Vushtrri, të cilët më 30 tetor (e enjte) do të pikturojnë gjatë gjithë ditës në Kalanë e Vushtrrisë, duke sjellë frymën rinore të krijimtarisë dhe ngjyrat e pasionit artistik. Krijimet e tyre do të vazhdojnë edhe të premten, duke paralajmëruar një fillim të bukur të Nëntorit – muajit të bashkimit dhe krenarisë shqiptare.
Pas tyre, skena do t’u takojë piktorëve profesionistë nga mbarë trojet shqiptare, mbi 50 artistë, të cilët marrin pjesë në Koloninë e Artit “Muaji i Pikturës”.
Të premten, ata do të vizitojnë monumentet kulturo-historike të qytetit të Vushtrrisë, për t’u frymëzuar nga trashëgimia dhe historia e vendit.
Të shtunën, do të zhvillohet krijimi i veprave artistike në ambient të hapur te Kalaja e Vushtrrisë, ndërsa të dielën, më 02 nëntor, duke filluar nga ora 17:00, do të mbahet ekspozita përmbyllëse në Galerinë e Shtëpisë së Kulturës “Hasan Prishtina”, ku do të shpalosen ngjyrat, ndjenjat dhe mesazhet e këtij udhëtimi artistik.
Ekspozita e këtij edicioni ka karakter shitës, dhe të gjitha të ardhurat do të dhurohen për qëllime humanitare ose për fëmijët me nevoja të veçanta.
Një pjesë e pikturave do t’u dhurohen Spitalit të Vushtrrisë, si shenjë falënderimi dhe kujdesi ndaj komunitetit.
Po ashtu, ftohen të gjitha bizneset e Vushtrrisë që të marrin pjesë në ekspozitë dhe, sado pak, të kontribuojnë me blerjen e pikturave, duke mbështetur kështu artin dhe humanizmin.
Një risi e veçantë e këtij edicioni është pjesëmarrja e artistëve muralistë nga Anglia dhe Gjermania, të cilët do të realizojnë murale artistike në hapësira publike të qytetit të Vushtrrisë, duke i dhënë atij një identitet të ri urban dhe bashkëkohor.
Në këtë edicion, arti bëhet ura që lidh të gjitha trojet shqiptare — nga Shqipëria, Kosova, Maqedonia e Veriut, Mali i Zi e diaspora — në një ngjarje që e hap Nëntorin me ngjyrat e bashkimit kombëtar përmes artit.
