Shqipëria është një nga vetëm dy ekonomitë e Ballkanit Perëndimor ku shitjet online nga bizneset janë rritur ndjeshëm në 2025, në një kohë kur në nivel rajonal përdorimi i këtij kanali ka rënë. Pjesa e kompanive shqiptare që shesin mallra ose shërbime online arriti në 26%, nga 19% një vit më parë, duke e vendosur vendin të dytin në rajon pas Serbisë.
Të dhënat e publikuara nga Këshilli Rajonal i Bashkëpunimit (RCC), tregojnë se vetëm 20% e bizneseve në gjashtë ekonomitë e Ballkanit Perëndimor shesin aktualisht online. Kjo përqindje është 7 pikë përqindjeje më e ulët se në 2024, kur mesatarja rajonale ishte 27%. Raporti veçon Shqipërinë dhe Serbinë si dy ekonomitë që kanë shënuar rritje të fortë krahasuar me një vit më parë.
Në Shqipëri, pjesa e bizneseve që përdorin internetin si kanal shitjeje u rrit me 7 pikë përqindjeje, nga 19% në 2024 në 26% në 2025. Në të njëjtën periudhë, Serbia u ngjit nga 17% në 27%. Kështu, Serbia renditet e para në rajon dhe Shqipëria e dyta.
Pas Shqipërisë vjen Maqedonia e Veriut, ku sipas raportit 23% e bizneseve shesin online. Mali i Zi është në 18%, Kosova në 13% dhe Bosnjë-Hercegovina në rreth 10%. Në këtë mënyrë, Shqipëria është 6 pikë përqindjeje mbi mesataren e Ballkanit Perëndimor dhe vetëm një pikë pas Serbisë.
Ndryshimi është edhe më i dukshëm nëse shihet krahasimi me vitin e kaluar. Në 2024, Shqipëria ishte nën mesataren rajonale, me 19% të kompanive që shisnin online kundrejt 27% në BP. Një vit më pas raporti përmbyset: Shqipëria arrin në 26%, ndërsa mesatarja rajonale zbret në 20%. Pra, diferenca e Shqipërisë ndaj rajonit ka kaluar nga 8 pikë përqindjeje nën mesatare në 2024 në 6 pikë mbi të në 2025.
Rënia rajonale lidhet me ndryshime të mëdha në disa ekonomi. Nga të dhënat rezulton se Bosnjë-Hercegovina kishte 48% të bizneseve që shisnin online në 2024, ndërsa në 2025 kjo pjesë është rreth 10–11%. Kosova ra nga 37% në 13% dhe Mali i Zi nga 21% në 18%. Në drejtim të kundërt lëvizën Shqipëria, Serbia dhe Maqedonia e Veriut.
Megjithatë, fakti që më shumë kompani shqiptare po përdorin tregtinë elektronike nuk do të thotë se shitjet online kanë marrë ende një peshë dominuese në xhiron e tyre. Raporti tregon se, në nivel rajonal, pjesa më e madhe e kompanive që shesin online sigurojnë vetëm një pjesë të të ardhurave përmes këtij kanali. Në Ballkanin Perëndimor, 29% e këtyre bizneseve deklarojnë se 1–10% e të ardhurave vijnë nga shitjet online, 26% sigurojnë 11–20% dhe 33% sigurojnë 21–50%.
Për Shqipërinë, raporti tregon gjithashtu një shpërndarje relativisht të gjerë të shitjeve online në të ardhurat e kompanive, çka sugjeron se për shumë prej tyre interneti po funksionon ende si kanal plotësues krahas shitjeve tradicionale dhe jo si burimi kryesor i xhiros./ekofin.al
