Prodhimi i energjisë diellore në Evropën Jugore luajti një rol kryesor në shmangien e mungesës së energjisë gjatë valëve të të nxehtit të javëve të fundit, kur temperaturat thyen rekorde.
Energjia diellore është veçanërisht e përshtatshme për të përballuar nxehtësinë e verës pasi rrezatimi i diellit është më i fortë në pjesën më të nxehtë të ditës kur kërkesa për energji elektrike është gjithashtu në nivelin më të lartë.
“Rritja e prodhimit të energjisë diellore në thelb kompenson mungesat që shkaktohen nga ajri i kondicionuar,” tha Kristian Ruby, sekretari i përgjithshëm i grupit të industrisë së energjisë elektrike Eurelectric, duke ju referuar situatës në Spanjë.
Spanja dhe Greqia janë ndër vendet që kanë instaluar më tepër panele diellore përballë çmimeve të larta të energjisë vitin e kaluar dhe përpjekjes për rritjen e sigurisë energjetike pas pushtimit rus të Ukrainës.
Catania, poshtë malit Etna në Sicilinë lindore, është përballur me ndërprerje të furnizimit me energji dhe ujë, për të cilat zyrtarët lokalë fajësuan pjesërisht nxehtësinë. Në Athinë, operatori i rrjetit të energjisë IPTO tha se zjarret kishin dëmtuar pjesë të rrjetit elektrik.
Por prodhimi më i lartë diellor ndihmoi për të përmbushur kërkesën në të dy vendet. Në Greqi këtë vit, fotovoltaikët diellorë mbuluan 3.5 GW nga kërkesa totale prej 10.35 GW, tha operatori i rrjetit IPTO.
Edhe në vendet perëndimore më të freskëta dhe më pak me diell si Belgjika, energjia diellore ka mbuluar më shumë se 100 për qind të energjisë shtesë të nevojshme gjatë rritjes së kërkesës për energji në mesditë.
Pavarësisht rritjes së shpejtë të saj, solare është ende një pjesë relativisht e vogël e përzierjes së energjisë në shumicën e vendeve, ku burimet duke përfshirë erën, gazin, qymyrin dhe energjinë bërthamore zakonisht mbulojnë pjesën më të madhe të kërkesës gjatë vitit.
Analistët thonë se një faktor i dytë ka ndihmuar në funksionimin e sistemeve energjetike të Evropës këtë verë: në përgjithësi, kërkesa për energji ka qenë relativisht e ulët.
Kështu ka ndodhur që nga kriza energjetike e Evropës vitin e kaluar, kur Rusia ndërpreu dërgesat e gazit në Evropë. Çmimet e energjisë në Evropë janë ende të larta krahasuar me nivelet historike dhe detyrimisht konsumatorët dhe industritë janë përgjigjur duke konsumuar më pak energji.
Përkthyer dhe përshtatur nga thestandard.com.hk për Probizz.al
