BE-ja njoftoi të hënën se ka nisur një hetim zyrtar ndaj TikTok lidhur me shkeljet e pretenduara të detyrimeve të tij për të mbrojtur të miturit në internet, sipas një ligji të ri për përmbajtjen dixhitale.
Ky është hetimi i dytë në një platformë të madhe në internet që kur Brukseli prezantoi Aktin e Shërbimeve Dixhitale (DSA).
Brukseli është veçanërisht i shqetësuar se aplikacioni për ndarjen e videove në pronësi të ByteDance të Kinës mund të mos jetë duke bërë mjaftueshëm për të adresuar ndikimet negative tek të rinjtë.
Shqetësimet e Komisionit Evropian përfshijnë gjithashtu mjetet e verifikimit të moshës së TikTok, të cilat tha se “mund të mos jenë të arsyeshme, proporcionale dhe efektive”.
Veprimi vjen pas analizimit të një raporti të vlerësimit të rrezikut nga TikTok dhe përgjigjeve të tij ndaj kërkesave të Brukselit për më shumë informacion rreth masave që platforma e ndarjes së videove ka marrë kundër përmbajtjes së paligjshme, mbrojtjes së të miturve dhe aksesit në të dhëna.
“Si një platformë që arrin miliona fëmijë dhe adoleshentë, TikTok duhet të pajtohet plotësisht me DSA dhe ka një rol të veçantë për të luajtur në mbrojtjen e të miturve në internet,” tha komisioneri i tregut të brendshëm të BE-së, Thierry Breton.
TikTok ka mbi 142 milionë përdorues mujorë në të gjithë BE-në, nga 125 milionë vitin e kaluar.
Përkthyer dhe përshtatur nga France24 për Probizz.al