Albanian ESG Network, AmCham Albania dhe AmCham Kosovo, me mbështetjen e Ministrisë së Mjedisit dhe me Business Magazine Albania si Partner Mediatik, do të mbledhin më 6 tetor 2026 në Tiranë përfaqësues të biznesit, qeverisë, institucioneve financiare dhe partnerëve ndërkombëtarë, me synimin për ta kthyer ESG-në në një instrument konkret për konkurrueshmërinë, aksesin në tregje dhe integrimin europian.
Konferenca “Turn ESG into Business Value: From Commitment to Competitive Advantage” do të zhvillohet më 6 tetor 2026, nga ora 09:00 deri në 15:00, në Tirana Marriott Hotel – Amantia. Aktiviteti organizohet nga Albanian ESG Network, anëtar i CSR Europe, në partneritet të ngushtë me AmCham Albania dhe AmCham Kosovo, me mbështetjen e Ministrisë së Mjedisit të Republikës së Shqipërisë dhe me Business Magazine Albania si Partner Mediatik.
Ndërsa Shqipëria dhe Kosova avancojnë në rrugën e integrimit europian, qëndrueshmëria dhe praktikat ESG, mjedisore, sociale dhe të qeverisjes, po shndërrohen gjithnjë e më shumë në kushte të rëndësishme për konkurrueshmërinë, aksesin në tregje dhe financim, si dhe qëndrueshmërinë afatgjatë të kompanive.
Politikat e Bashkimit Europian, kërkesat në zinxhirët e furnizimit, institucionet financiare dhe partnerët ndërkombëtarë po kërkojnë gjithnjë e më shumë që kompanitë të dëshmojnë praktika të besueshme ESG. Kjo prek drejtpërdrejt kompanitë e orientuara drejt eksportit, SME-të e integruara në zinxhirët europianë të vlerës, por edhe bizneset që kërkojnë akses në financime të lidhura me klimën dhe qëndrueshmërinë.
Programi i konferencës do të fokusohet në tri çështje kryesore: mënyrën se si kërkesat europiane, investitorët, klientët dhe zinxhirët e furnizimit po ndryshojnë mjedisin konkurrues për kompanitë shqiptare; kalimin nga strategjia ESG në zbatimin praktik të saj; si dhe krijimin e partneriteteve që mund ta shndërrojnë ESG-në nga një përpjekje individuale e kompanive në një avantazh të përbashkët konkurrues për Shqipërinë dhe Kosovën.
Një pjesë e rëndësishme e diskutimit do t’i kushtohet Udhëzuesit ESG, të zhvilluar në bashkëpunim me Albanian ESG Network. Dokumenti do të shqyrtohet përballë kushteve reale të biznesit, duke analizuar nëse është praktik dhe proporcional, nëse mund të përdoret si nga kompanitë e mëdha ashtu edhe nga SME-të dhe nëse gjeneron informacion të vlefshëm për bankat dhe investitorët.
Konferenca do të theksojë gjithashtu se zbatimi i ESG-së nuk mund të realizohet vetëm nga bizneset. Ai kërkon bashkëpunim mes qeverisë, sektorit privat, institucioneve financiare, dhomave të tregtisë, partnerëve ndërkombëtarë dhe vendeve të rajonit. Në këtë kontekst, Shqipëria dhe Kosova synojnë të eksplorojnë mundësinë që ESG të shërbejë si një platformë për krijimin e një avantazhi të përbashkët konkurrues.
Dita do të përmbyllet me sesionin “From Dialogue to Action”, ku pjesëmarrësit do të angazhohen për veprime konkrete, i ndjekur nga një sesion takimesh B2B dhe ndërveprimi mes pjesëmarrësve.
Mes folësve dhe pjesëmarrësve janë Sofjan Jaupaj, Ministër i Mjedisit; Enkelejd Musabelliu, Zëvendësministër i Ekonomisë dhe Inovacionit; Ingrid Macdonald, Koordinatore e Përhershme e Kombeve të Bashkuara në Shqipëri; Niklas Ström, Ambasador i Suedisë; Dr. Natasha Ahmetaj, Zëvendësguvernatore e Dytë e Bankës së Shqipërisë; Boris Janjalia nga International Finance Corporation (IFC); Morris Massarutto nga CSR Europe, si dhe përfaqësues të kompanive kryesore, institucioneve financiare, AmCham Albania dhe AmCham Kosovo.
Një nga rezultatet e synuara të konferencës është arritja e dakordësisë për deri në tre iniciativa të përbashkëta prioritare, të cilat do të zbatohen gjatë periudhës 2027–2029. Gjithashtu, Udhëzuesi ESG do të shqyrtohet konkretisht për përdorimin e tij në kushtet reale të biznesit.
Në konferencë do të marrin pjesë kompani të mëdha dhe SME, anëtarë të AmCham, institucione financiare, agjenci qeveritare dhe rregullatorë, ambasada dhe partnerë ndërkombëtarë të fokusuar te ESG, institucione akademike dhe kërkimore, si dhe përfaqësues të medias.
Gazetarët janë të ftuar të ndjekin konferencën. Për akreditim ose organizimin e intervistave me folësit dhe organizatorët, mund të kontaktojnë Kristina Lato, ESG & Communication Manager pranë Albanian ESG Network, në numrin 069 839 0918.
Konferenca: “Turn ESG into Business Value: From Commitment to Competitive Advantage”
Data: 6 tetor 2026
Ora: 09:00–15:00
Vendi: Tirana Marriott Hotel – Amantia, Tiranë
Organizatorë: Albanian ESG Network, AmCham Albania, AmCham Kosovo
Me mbështetjen e: Ministrisë së Mjedisit të Republikës së Shqipërisë
Partner Mediatik: Business Magazine Albania
