Kur zgjohemi, truri kalon përmes një faze të quajtur “sleep inertia”, tranzicioni nga gjumi drejt zgjimit të plotë. Përqendrimi, vëmendja, kontrolli emocional dhe kreativiteti aktivizohen gradualisht, ndërsa memoria jonë afatshkurtër është ende relativisht e “pastër”.
Pikërisht për këtë arsye, informacioni që konsumojmë në minutat e para mund të ndikojë në mënyrën se si truri do të fokusohet gjatë pjesës tjetër të ditës.
Dhe këtu hyn telefoni.
Duke hapur menjëherë rrjetet sociale, lajmet apo njoftimet, i japim trurit një dozë të menjëhershme informacioni, krahasimi social, shqetësimi dhe stimulimi. Sipas Kwik, kjo mund të ndikojë në humorin, fokusin dhe mënyrën se si interpretojmë ngjarjet gjatë ditës.
Ekziston edhe faktori i dopaminës. Një feed i optimizuar për të tërhequr vazhdimisht vëmendjen i ofron trurit stimulim të shpejtë dhe pa përpjekje. Pas kësaj, aktivitetet normale – një kafe, pak qetësi apo përgatitja për punë – mund të duken më pak interesante dhe truri fillon të kërkojë vazhdimisht stimulimin e radhës.
Alternativa e Kwik është shumë e thjeshtë: “Mind Before Media” – mendja përpara medias.
Në vend që dita të nisë me atë që algoritmi ka zgjedhur për ne, ai sugjeron të kalojmë disa minuta me mendimet tona, të lexojmë disa faqe nga një libër ose thjesht të përcaktojmë se ku duam ta vendosim vëmendjen gjatë ditës.
Nuk bëhet fjalë për të hequr dorë nga telefoni.
Bëhet fjalë për një pyetje shumë më të thjeshtë: Kush do të flasë i pari me ju në mëngjes – mendimet tuaja apo algoritmi?
Pesë minuta pa telefon mund të duken të parëndësishme. Por mënyra se si e ushqejmë mendjen në minutat e para mund të përcaktojë mënyrën se si ajo do ta përballojë pjesën tjetër të ditës.
