Nuk është e zakontë të shohim heronj çdo ditë të jetës sonë, por ndodh që ata i gjejmë te njerëzit e thjeshtë, mes nesh, që vetëflijohen për të shpëtuar jetën e të tjerëve. Padyshim që Arjan Sala mund të konsiderohet hero. Ai, sigurisht nuk kishte se si ta dinte që ajo pasdite do të mblidhte orët e tij të fundit, por nuk ngurroi aspak të vraponte për të nxjerrë jashtë magazinës punonjësit e tjerë të saj, duke u futur mes flakëve që sa vinin dhe shtoheshin, e për t’i shuar ato. Sala, punonjësi i sigurisë, ka shpëtuar rreth 20 punonjës të tjerë, por fatkeqësisht nuk ka mundur që të dalë vetë nga aty.
Pas më shumë se 48 orësh kërkime nga forcat zjarrëfikëse, trupi i ndjerit Arjan Sala është gjetur pak pas mesnate, përkatësisht në orën 03:00 të mëngjesit nga forcat zjarrëfikëse në magazinën në qendrën tregtare ‘Casa Italia’. Lajmin e ka bërë të ditur policia e shtetit, e cila me anë të një njoftimi shkruan se trupi i pajetë i përket të riut.
‘Si rezultat i kërkimeve intensive, të pandëprera, nga zjarrëfiksit dhe shërbimet e Policisë, mëngjesin e sotëm zjarrëfiksit bënë të mundur gjetjen e trupit të pajetë që dyshohet se i përket shtetasit Arjan Sala, 32 vjeç, i cili ishte me detyrë punonjës i shërbimit të sigurisë të një kompanie private.’
Trupi i pajetë është dërguar në morg për t’iu nënshtruar ekspertizës mjeko-ligjore menjëherë pasi xhaxhai i të riut bëri të mundur identifikimin e trupit. Sala kishte djegie të thella në disa pjesë të ndryshme të trupit.
Zjarri nisi pasditen e së mërkurës rreth orës 16:00 një magazinë tek Casa Italia. Sipas dëshmitarëve, Sala, punonjësi i magazinës kishte mbetur i bllokuar në katin e nëndheshëm të magazinës e cila shërbente për të mbajtur furnizimet me rroba që vinin për qendrën tregtare.
