Burrat marrin më shumë kredi, por gratë përfitojnë më shumë financim në raport me numrin e bizneseve që drejtojnë.
Në vitin 2025, rreth 76% e kredive u dhanë për ndërmarrjet mikro, të vogla dhe të mesme të drejtuara nga burrat dhe vetëm 24% për ato të drejtuara nga gratë. Kjo ndarje është normale, duke marrë parasysh që në krye të shumicës së bizneseve në Shqipëri qëndrojnë meshkujt. Për rrjedhojë, ka pasur kërkesë më të lartë dhe janë kanalizuar më shumë kredi për këtë gjini.
Pavarësisht se më shumë ndërmarrje drejtohen nga meshkuj, shkalla e penetrimit të financimit është më e lartë te femrat. Kjo do të thotë se në raport me numrin total të ndërmarrjeve mikro, të vogla dhe të mesme të drejtuara nga gratë, këto të fundit kanë tërhequr më shumë financim nga bankat.
Shumica e kredive për ndërmarrjet mikro, të vogla dhe të mesme janë të përqendruara në qarkun e Tiranës, ndjekur më pas nga Durrësi.
Por për çfarë i përdorin këto kredi?
Biznesmenët marrin kredi kryesisht për aktive të qëndrueshme dhe pajisje, ndërsa femrat sipërmarrëse për kapital qarkullues. Një tjetër arsye e fortë është investimi i parave në pasuri të paluajtshme. Për sa i përket sektorëve, ndërmarrjet mikro, të vogla dhe të mesme që operojnë në tregti me shumicë dhe pakicë, riparim i mjeteve motorike dhe motoçikletave, janë ato që kërkojnë më tepër kredi.
Huatë afatgjata janë më të preferuarat. Pas tyre, instrumentet më të zgjedhura për të siguruar financim, janë kartat e kreditit për ndërmarrjet mikro, të vogla dhe të mesme të drejtuara nga gratë dhe overdraftet për ato të drejtuar nga burrat.
