Rivlerësimi i pasurive të paluajtshme me normën e reduktuar të tatimit prej 5% ka sjellë një kursim të konsiderueshëm për qytetarët dhe bizneset që kanë kryer transaksione me pronat e tyre. Sipas Administratës Tatimore, vetëm gjatë periudhës mars–shtator 2026, kostoja fiskale e kursyer për tatimpaguesit llogaritet në 156 milionë euro.
Shifra përfaqëson efektin e lehtësisë fiskale të krijuar nga rivlerësimi, i cili u mundëson pronarëve të përditësojnë vlerën e pasurive të paluajtshme kundrejt një tatimi 5%. Në këtë mënyrë, në rastin e shitjes së mëvonshme të pronës, diferenca mes çmimit të shitjes dhe vlerës së rivlerësuar është më e vogël, duke reduktuar edhe detyrimin tatimor që lind nga transaksioni.
Administrata Tatimore e konsideron këtë një lehtësi konkrete fiskale, e cila ka ulur barrën për qytetarët dhe bizneset dhe ka krijuar një përfitim të drejtpërdrejtë për tatimpaguesit.
Në praktikë, rivlerësimi është veçanërisht i rëndësishëm për pronat që rezultonin të regjistruara me vlera dukshëm më të ulëta se çmimet aktuale. Duke paguar tatimin 5% mbi diferencën që krijohet nga rivlerësimi, pronari përditëson vlerën fiskale të pasurisë, e cila më pas shërben si bazë për llogaritjen e detyrimit në rast të një transaksioni të ardhshëm.
Sipas të dhënave të publikuara nga Tatimet, efekti financiar i kësaj skeme ka arritur në 156 milionë euro kosto fiskale të kursyer për tatimpaguesit vetëm nga marsi deri në shtator 2026. Kjo nënkupton të ardhura nga të cilat buxheti ka hequr dorë për shkak të trajtimit fiskal më të favorshëm, ndërsa për qytetarët dhe bizneset përkthehet në një barrë më të ulët tatimore.
Skema e rivlerësimit krijon njëkohësisht një stimul për formalizimin e vlerës së pasurive, duke afruar vlerën e regjistruar të tyre me atë të tregut. Përfitimi bëhet veçanërisht i prekshëm kur prona shitet, pasi tatimi mbi kalimin e së drejtës së pronësisë llogaritet mbi një diferencë më të vogël ndërmjet vlerës së shitjes dhe asaj të njohur fiskalisht./ekofin
