Rasti i parë i përzierjes së dy sëmundjeve COVID-19 dhe gripit, i quajtur “Flurona”, është regjistruar në Izrael.
Raportet lokale thanë se pacientja ishte një grua e re shtatzënë e cila ishte në spital, por kishte simptoma të lehta.
Ministria e Shëndetësisë e Izraelit po studion këtë rast të paprecedentë me idenë për të qenë në gjendje të konfirmojë se kombinimi i këtyre dy viruseve nuk shkakton një infeksion më serioz.
“Ajo u diagnostikua me grip dhe koronavirus sapo mbërriti. Të dy testet dolën pozitive, edhe pasi u kontrolluam përsëri,” tha Arnon Vizhnitser, drejtor i departamentit gjinekologjik të spitalit Beilinson në qytetin Petah Tikva.
“Sëmundja është e njëjta sëmundje; ato janë virale dhe shkaktojnë vështirësi në frymëmarrje sepse që të dyja sulmojnë traktin e sipërm respirator,” tha ai për gazetën Hamodia.
Publikimi tha se ajo nuk ishte vaksinuar kundër COVID-19 ose gripit. Gruaja doli të enjten nga spitali, në gjendje të mirë.
Çfarë dimë deri tani për Fluronën?
Për momentin, dimë shumë pak për Fluronën.
Ministria e Shëndetësisë e Izraelit po studion rastin për të parë nëse kombinimi i dy viruseve shkakton sëmundje më të rënda.
Ministria tha të mërkurën se kishte shënuar një rritje shqetësuese të rasteve të gripit.
Javën e kaluar, një grua shtatzënë 31-vjeçare vdiq nga komplikimet e gripit në muajin e nëntë të shtatzënisë. Djali i saj, i lindur me prerje cezariane, mbijetoi.
“Vitin e kaluar nuk kemi qenë dëshmitarë të rasteve të gripit në mesin e grave shtatzëna apo lindjeve”, tha Vizhnitser. “Sot, ne po shohim raste si të koronavirusit ashtu edhe të gripit që kanë filluar të ngrenë kokën.”
Burimi: Euronews
