Në kuadër të projektit “Fjalët kanë rëndësi ; Fjalët lëndojnë! Fjalët shërojnë!”, u zhvillua në ambientet e Universitetit të Elbasanit një aktivitet i veçantë, i cili vendosi në qendër fuqinë e fjalës dhe rolin e saj në promovimin e barazisë gjinore. Projekti zbatohet nga IRCA, në kuadër të skemës së nëngrantimit të iniciativës “RISE HER ; Fuqizimi i Grave dhe Vajzave për një Jetë të Pavarur”, financuar nga Bashkimi Europian në Shqipëri dhe i implementuar nga World Vision Albania dhe Forumi i Gruas Elbasan, në bashkëpunim me Ministrinë e Shëndetësisë dhe Mbrojtjes Sociale.
Në këtë nismë kanë luajtur një rol thelbësor edhe aktorë kyç si Bashkia Elbasan, Bashkia Librazhd dhe Universiteti “Aleksandër Xhuvani”, të cilët kanë qenë të angazhuar në mënyrë aktive në të gjitha fazat e zbatimit.
Ekspozita solli për publikun histori frymëzuese të grave dhe vajzave që kanë sfiduar pabarazinë gjinore, të prezantuara përmes një udhëtimi vizual me 30 fotografi, të shoqëruara me mesazhe të fuqishme ndërgjegjësuese. Ky format synon të nxisë reflektim mbi ndikimin e fjalëve në formësimin e qëndrimeve, në thyerjen e stereotipeve dhe në ndërtimin e një shoqërie më të drejtë e gjithëpërfshirëse.
Programi përfshiu fjalë përshëndetëse nga përfaqësues institucionalë, si dhe një diskutim interaktiv me gratë dhe vajzat pjesëmarrëse, duke përfshirë edhe studentët, të cilët u bënë pjesë aktive e një dialogu të hapur mbi rëndësinë e komunikimit dhe fuqizimit përmes fjalës.
