Qeveria po përgatitet të miratojë Strategjinë Kombëtare Industriale 2026-2030, një dokument që synon transformimin e sektorit prodhues shqiptar, rritjen e konkurrueshmërisë së bizneseve dhe integrimin më të thellë të ekonomisë në zinxhirët europianë të vlerës.
Dokumenti, i propozuar nga Ministria e Ekonomisë, parashikon katër objektiva kryesore: transformimin e prodhimit përmes digjitalizimit dhe dekarbonizimit, forcimin e eksporteve dhe integrimit në tregun europian, nxitjen e inovacionit industrial dhe krijimin e instrumenteve të reja financiare për mbështetjen e biznesit.
Sipas të dhënave të strategjisë, industria përpunuese aktualisht kontribuon me vetëm 6.5% në ekonominë shqiptare, dukshëm më pak se mesatarja e Bashkimit Europian prej mbi 14%. Qeveria synon që deri në vitin 2030 kjo peshë të rritet në të paktën 9%.
Një pjesë e rëndësishme e planit lidhet me modernizimin e ndërmarrjeve shqiptare përmes teknologjive të reja, rritjes së investimeve në kërkim dhe zhvillim, si dhe krijimit të parqeve eko-industriale.
Strategjia synon gjithashtu të rrisë praninë e produkteve shqiptare në tregjet europiane. Aktualisht, sektori fason mbetet dominues në industrinë vendase, ndërsa qeveria kërkon të inkurajojë kompanitë që të kalojnë nga modeli tradicional i prodhimit me porosi drejt zhvillimit të markave dhe produkteve me vlerë më të lartë të shtuar.
Në fokus të dokumentit janë edhe investimet e huaja direkte. Sipas strategjisë, vetëm një pjesë e kufizuar e investimeve të huaja aktuale orientohen drejt sektorit prodhues, ndërsa objektivi është të rritet interesi për investime në industri, teknologji dhe përpunimin e lëndëve të para.
Një rol të veçantë zë sektori i mineraleve strategjike, ku Shqipëria synon të përfitojë nga kërkesa në rritje e Bashkimit Europian për lëndë të para kritike si: kromi, nikeli dhe bakri. Dokumenti parashikon zhvillimin e kapaciteteve të përpunimit dhe forcimin e bashkëpunimit me iniciativat europiane në këtë fushë.
Strategjia parashikon gjithashtu rritjen e investimeve në inovacion, me objektivin që shpenzimet për kërkim dhe zhvillim të arrijnë në 1% të Prodhimit të Brendshëm Bruto deri në vitin 2030. Në këtë kuadër planifikohet ngritja e qendrave të inovacionit dhe mbështetja e startup-eve që operojnë në sektorin industrial dhe teknologjik.
Për të adresuar mungesën e financimit për bizneset prodhuese, dokumenti parashikon funksionalizimin e Bankës Shqiptare të Zhvillimit, krijimin e skemave të garancive të kredive dhe instrumenteve të financimit për ndërmarrjet e vogla dhe të mesme.
Një tjetër objektiv lidhet me tregun e punës. Strategjia synon rritjen e numrit të specialistëve të teknologjisë së informacionit në ekonomi dhe përafrimin më të madh të arsimit profesional me nevojat e industrisë, në përpjekje për të frenuar emigrimin e kapitalit njerëzor të kualifikuar.
Qeveria argumenton se zbatimi i strategjisë do të ndihmojë në rritjen e produktivitetit, krijimin e vendeve të reja të punës dhe forcimin e konkurrueshmërisë së ekonomisë shqiptare në procesin e integrimit europian.
Dokumenti pritet të shërbejë si korniza kryesore e politikës industriale të vendit deri në vitin 2030./ BusinessMag
