Veriflot, një nga kompanitë më të reja dhe inovative në Shqipëri, po transformon tregun e platformave software që prej themelimit të saj në vitin 2018. Duke zhvilluar produkte të avancuara teknologjike si Easyflot, një software për GPS Tracking dhe Menaxhimin e Flotës, Veriflot ka arritur të konkurrojë suksesshëm në tregje të mëdha si Shqipëria, SHBA dhe Italia. Për të mësuar më shumë rreth zhvillimeve të fundit dhe planeve të ardhshme të kompanisë, ne intervistuam Ditmar Zhegun, Menaxher Operacional pranë Veriflot, cili na tregoi për platformën e re inovative Veriflot Assist që synon të revolucionalizojë mënyrën se si qytetarët dhe kompanitë ndërveprojnë me sigurimet.
Na tregoni pak për historikun e startup-it tuaj. Si lindi ideja dhe cilat ishin hapat fillestarë që ndërmorët për të krijuar këtë biznes?
Veriflot është një kompani e themeluar në vitin 2018 dhe fokusohet në zhvillimin e platformave software. Jemi ndër të paktat kompani shqiptare që zhvillon 100% produktin dhe e rishet vetë. Platforma më e suksesshme e zhvilluar nga ne është Easyflot, një software për GPS Tracking dhe Menaxhimin e Flotës, e vetmja platformë e këtij lloji e zhvilluar plotësisht nga një ekip shqiptar. Platforma Easyflot aktualisht po shitet në Shqipëri, SHBA dhe Itali.
Ideja e Veriflot Assist lindi nga eksperienca jonë me klientët tanë në fushën e GPS Tracking. Rreth 90% e dëmeve të vogla (gërvishtje, thyerje fenerësh, etj.) zgjidhen nga palët në mënyrë private pa plotësuar Raportin Europian të Aksidenteve. Edhe në rastet kur plotësohet raporti europian, për mungesë dokumentacioni, palët nuk dëmshpërblehen nga kompanitë e sigurimeve. Për shembull, fotot e aksidentit dhe skicat janë të domosdoshme, por për mungesë informacioni nga palët, fotot nuk bëhen në vendngjarje dhe si pasojë kompensimi i dëmit nuk kryhet. Duke zhvilluar një platformë e cila ndjek të gjithë procesin në mënyrë digjitale, palët nuk humbasin asgjë. Qëllimi ynë final është të bëjmë integrime API me kompanitë e sigurimeve në mënyrë që sistemet të komunikojnë automatikisht dhe në kohë reale kompania e sigurimeve të marrë formularin e plotësuar.
Cilat janë arritjet më të mëdha të deritanishme të startup-it tuaj?
Veriflot Assist do të zhvillohet shumë shpejt. Ky grant do i japë një tjetër dimension të gjithë konceptit, pasi do të kemi mjaftueshëm buxhet edhe për marketing. Kështu, konsumatori final do të informohet më shpejt mbi ekzistencën e platformës.
Si e shihni zhvillimin e startup-it tuaj në 3-5 vitet e ardhshme?
Ideja e Veriflot Assist lindi nga vetë kërkesa e tregut dhe jam i bindur që brenda vitit përdorimi i tij do të jetë masiv, jo vetëm për të dokumentuar aksidente por edhe për t’u informuar mbi tregun e sigurimeve në përgjithësi dhe të drejtat që çdo qytetar disponon për t’u dëmshpërblyer nga kompanitë e sigurimit. Në 3-5 vitet e ardhshme, e shikoj platformën si kanalin e vetëm ku çdo qytetar do të gjejë zgjidhje për sa i përket policave të sigurimit, jo vetëm sigurimeve të detyruara me ligj por edhe atyre vullnetare.
Si e vlerësoni mbështetjen e qeverisë dhe institucioneve të tjera për startup-et në vendin tonë?
Çdo ide ka nevojë për promovim dhe grantet natyrisht janë forma e duhur. Në fund të fundit, asnjë ide nuk mund të vihet në jetë pa fonde. E vlerësoj shumë mbështetjen e qeverisë pasi është një shtysë në stimulimin e ideve të reja, por gjithashtu jam i mendimit që ka nevojë për më shumë përpjekje. Do të doja shumë që bizneset teknologjike të trajtohen ndryshe në aspektin fiskal. Dua të përmend rastin e Estonisë, ku norma e tatimit për fitimet e reinvestuara është 0%. Kjo politikë është veçanërisht e dobishme për startup-et dhe kompanitë e software që shpesh kanë nevojë të reinvestojnë fitimet e tyre në zhvillimin e produkteve dhe zgjerimin e operacioneve të tyre.
A keni ndonjë partneritet apo bashkëpunim që ka qenë kyç për zhvillimin e startup-it tuaj?
Klientët aktualë të Veriflot janë kompani me flota automjetesh të konsiderueshme dhe mendoj se eksperienca me këto kompani ka qenë vendimtare për të krijuar konceptin si pasojë e vetë nevojës që këto kompani kanë. Por jo vetëm kompanitë, edhe eksperienca e shumë individëve forcon idenë për të zhvilluar këtë produkt.
Cila është vizioni juaj për të ardhmen e startup-it tuaj dhe si dëshironi që të kujtohet startup-i juaj në industrinë ku operoni?
Siç e përmenda më sipër, në një perspektivë 3-vjeçare, e shikoj Veriflot Assist si kanalin e vetëm ku çdo kush ka mundësi jo vetëm të raportojë aksidente por edhe të informohet mbi çdo produkt në fushën e sigurimeve, qofshin ato të detyrueshme me ligj ose vullnetare. Do të ishte shumë interesante që kompani sigurimi të huaja të kenë mundësinë e shitjes së sigurimeve vullnetare. Ligji e lejon blerjen e policave vullnetare nga operatorë të huaj, por çuditërisht deri më tani tregu nuk ka mjaftueshëm akses./Businessmag
