Transformimi digjital po ndryshon me ritme të shpejta pothuajse çdo industri, dhe sektori bankar nuk bën përjashtim. Rënia e përdorimit të parasë fizike ka krijuar presion të drejtpërdrejtë mbi infrastrukturën tradicionale të bankave, duke vënë në diskutim edhe një prej elementeve më të njohura të saj: bankomatet. Me rritjen e vazhdueshme të pagesave elektronike, roli i bankomateve klasike po zbehet ndjeshëm.
Në vitet e fundit, edhe pse paraja “cash” mbetet ende e rëndësishme për një kategori përdoruesish, pesha e saj në sistemin e pagesave ka rënë dukshëm. Kostot e larta të mirëmbajtjes së bankomateve krahas përdorimit gjithnjë e më të ulët kanë shtyrë bankat të rishikojnë modelet e tyre të operimit.
Teknologjitë e reja po e zëvendësojnë bankomatin tradicional me pajisje shumëfunksionale, të cilat nuk ofrojnë vetëm tërheqje parash, por edhe depozitime, identifikim automatik të kartës dhe një sërë shërbimesh bazike bankare, pa komisione shtesë, edhe për klientë të bankave të tjera.
Franca konsiderohet aktualisht ndër vendet më të avancuara në këtë proces. Sipas vlerësimeve të industrisë, vitin e ardhshëm pritet të instalohen rreth 7.000 pika të reja të shërbimeve moderne, duke zëvendësuar mijëra bankomate tradicionale. Kjo tendencë është veçanërisht e dukshme në zonat urbane, ku frekuentimi i bankomateve ka rënë ndjeshëm si rezultat i përhapjes së pagesave digjitale./businessmag
