Administrata Tatimore po përgatit ofensivë të rreptë kundër shmangies së tatimeve në disa sektorë “të nxehtë”, me fokus të veçantë në tregtinë online dhe tregtimin e aksioneve ndërmjet individëve. Drejtori i Përgjithshëm i Tatimeve, Ilir Binaj, njoftoi se këto dy fusha janë identifikuar si prioritare për kontroll dhe veprim të menjëhershëm gjatë këtij viti.
Në një konferencë shtypi me ministrin e Financave, Petrit Malaj, Binaj raportoi se për tregtinë në internet po mblidhen aktualisht të dhëna, duke përfshirë informacion nga bankat, për të gjitha pagesat që kryhen përmes platformave digitale. Qëllimi është të identifikohen subjektet që kryejnë aktivitet ekonomik në internet pa u regjistruar dhe pa paguar taksat e duhura.
“Tregtia online është një sektor për të cilin po përgatitm plane konkrete për adresimin e tij gjatë këtij viti,” theksoi drejtori Binaj. Rastet e identifikuara do të trajtohen nga drejtoritë specifike territoriale të DPT-së.
Sektori i dytë me “risk” të lartë, janë transaksionet private me aksione. Binaj shpjegoi se shumë shitje blerje aksionesh ndërmjet individëve për kompani të ndryshme kryhen me çmime simbolike, që nuk reflektojnë vlerën reale të tregut, me qëllim shmangien e taksave.
“Administrata Tatimore ka zhvilluar një model të ri për vlerësimin e këtyre transaksioneve, të cilat do të adresohen gjatë këtij viti,” deklaroi Binaj, duke lënë të kuptohet se do të zbatohen vlerësime të përputhshme me tregun për të llogaritur tatimin e duhur.
